專業繪圖卡與打機卡選擇

Last Updated: 2017/05/22

選擇打機卡(GeForce/Radeon)定係選擇繪圖卡(Quadro/Radeon Pro),視乎想用乜軟件。

 

有啲軟件係開發商官方完全支援打機卡,呢啲軟件係冇需要用到繪圖卡嘅。包括Adobe Creative Cloud系列、Cinema 4D、Agisoft Photoscan等。例如GTX 1070係Premiere Pro嘅性能一定遠超同價位嘅WX 5100或Quadro P2000,所以一般人都會揀返GTX 1070。

 

亦有啲軟件係官方唔支援打機卡,但係實際操作上唔會要求繪圖卡。包括Autodesk AutoCAD、3ds Max等。呢類軟件用打機卡性能唔會輸蝕,當然同價錢一定係打機卡性能會較高,但代價係Autodesk等軟件開發商唔會建議使用,並且對於呢啲用戶未必會肯提供技術支援。所以,用呢類軟件,就要衡量下自己有幾需要軟件嘅官方支援。

 

亦有啲軟件係直頭要求繪圖卡先可以用全部功能,或者打機卡嘅效能會輸蝕。例如用打機卡行SolidWorks唔係唔得,但性能會打折扣,甚至低於同價嘅繪圖卡。呢啲情況就值得買繪圖卡啦,一來達致同樣性能嘅功耗會較打機卡低,二來能夠確保得到軟件廠商支援。

 

最後,有啲軟件嘅性能需求根本就唔需要用到GPU運算,但電腦因為某啲原因需要用到獨立顯示卡作影像輸出,例如使用不設IGP嘅CPU,或需要用到大量顯示屏。例如用作炒股而需要用到大量顯示屏,或純CPU運算嘅電腦。因為只係需要用到基本輸出,所以顯示卡性能唔重要,能夠支援到顯示屏解像度及數量已經得。呢啲電腦應該用打機卡定係繪圖卡,冇乜所謂,因為兩者都能夠做到輸出畫面。但係,繪圖卡會更穩定。


好多人會認為,GeForce同埋Radeon顯示卡系列,只係設計比遊戲用,而唔啱執相剪片繪圖等軟件用。亦有人認為,Quadro同埋Radeon Pro(前稱FirePro)系列所謂專業繪圖卡,只係Nvidia同埋AMD嘅呃錢技倆,一文不值。其實,呢兩個觀念都係錯。

 

簡單嚟講,專業繪圖卡同埋普通打機顯示卡最大分別,係個驅動支援。繪圖卡嘅driver會比較追求穩定,以及繪圖和GPU運算軟件效能。而打機卡嘅driver就會專注於遊戲入面嘅性能。打機卡嘅driver更新會較快,但穩定性會較低,繪圖卡就相反。

 

咁繪圖卡同埋打機卡嘅硬體分別呢?其實就唔大嘅。打機卡同繪圖卡基本上都係用返同樣嘅GPU芯片,同樣嘅VRAM。打機卡同時有公版同埋非公版嘅存在,非公版性能會較高但兼容性可能較低,繪圖卡嘅情況就好似淨係得公版咁,得一個設計,全球大部分地區都係只會有一個代理,例如Quadro 北美洲代理係PNY。單一設計能確保兼容性,降低成本,以及能夠準確猜測性能。要知道,繪圖卡個市場較細,所以冇非公卡嘅需求。同埋,繪圖卡嘅clockspeed通常較同樣芯片嘅打機卡低,以增加穩定性。例如WX 7100同埋RX 480同樣係用Polaris 10,但RX 480嘅GDDR5係行2000 MHz,而WX 7100只係行1750 MHz。繪圖卡比較穩定係事實,而且driver支援亦一般較打機卡長。

 

繪圖卡價錢比同樣芯片,性能接近嘅打機卡貴咁多,所以如果唔係軟件需要,一般用戶追求性價比都係會買返打機卡比專業軟件用。

 

實用網站: https://www.pugetsystems.com/ 係美國一間砌機服務公司,提供比好多唔同軟件嘅硬件推介,並且包含測試和其他資訊。