今次GX500係悠二電腦硬件砌機解說站第一篇走線分享.可能未必做得好.但悠二我盡量啦.希望各位砌機砌得開心.
另外因為只係分享不同機箱既走線.而唔係砌機教學.所以步驟可能有d大跳躍.
GX500雖然唔係而家市場上最新款既機箱.但其實GX500其實算係較為易走線.因為走線孔都開得幾足下.所以對走線唔熟悉既.都可以玩下.另外GX500功能性都幾高.有埋轉速控制器.而且送三把扇.400蚊樓下機箱.都可以諗諗佢
咁首先睇下機箱內部.同埋時間既關係我已經裝左火牛.都可以見到火牛既線已經係起哂下面個洞穿哂過去
之後要走既線係將CPU 8PIN線由機箱後面穿上過黎.呢個洞都係為左呢條線用
裝底板個時.壓住條CPU Pin線就OK
同埋如果底板只係需要4pin線既話.另外一條4pin線最好屈住唔好俾佢伸出黎.因為好易hi到機頂把扇
之後將底板24Pin由最上個個洞走出黎插去底板
機背既話可以用索帶起下面條柱搏住24pin
條CPU Pin都可以用索帶起下面搏住
之後將前面板既USB 3.0 , Jumper線,audio搵出黎.分開
再根據你塊板黎插.一般黎講.usb3.0其實係起右邊24pin下面的.不過呢塊板放下面唯有咁樣先
再去返機背用索帶搏住起呢個位
通常我自己習慣將HDD放起d HDD架下面.一陣會講原因
通常我自己習慣將DVD機放最頂既5.25吋架.同樣一陣會講原因
GX500既話.正面有兩舊白色野.其實係螺絲.但唔好信哂.上實左都係冇乜力的.所以上完呢邊之後.都要去後面再上螺絲.
之後將火牛sata電源線拎出黎.我自己習慣拎最入個個插頭插HDD.咁樣會拎到火牛同HDD最短距離.
之後好似下圖咁摺埋線.再塞入去HDD下面.呢個都係我習慣將HDD放起最底既原因.可以隱藏到d線
之後將GX500既前面板風扇轉速控制器既大四Pin搵出黎並穿過去放去前面
將帶有sata電源線同大四Pin線搵出黎.並且同樣由最底既洞穿返去前面
將sata電源線插左去dvd機後.再將機箱轉速控制器插去火牛大四Pin
將d線塞哂起機頂同5.25吋之間既喇位.呢個就係我習慣將dvd機放上去最頂既5.25吋既原因.用黎隱藏d線
之後開到sata線.可以由GX500下面既支柱位圍1-2個圈
因為GX500冇開MATX既走線洞關係.所以要由底板同機箱之間既喇位穿過去.如果由ATX既洞走過去.會好大條線露出黎
DVD就由最頂既位走返去機背.同樣由喇位插返
可以用索帶搏住d亂既線
到插Display Card.可以利用Display card既喇位黎放audio 線.其實一般唔使.係呢塊底板起呢個位先要咁
大致上係咁
未來會不定期再更新唔同機箱既走線.再講多次
我走線未必係走得最好.都未必走得最完整
但應該都滿足到一般人.完美主義者既話.我只能對你講.走啦.我唔想搞大佢
